Tusome i Kifuliiru

Ndondeero higulu lyo'kusoma i Kifuliiru

Guno mukolwa gwitu guliri hano higulu tuloziizi tusome, tusomeese indeto yitu Kifuliiru. Tuliri Bafuliiru, amalega gitu mahamu kuliri kudeta kwo indeto yitu ihike hala, ihikire abandu bingi, ne'ngingwe twehe twe'Bafuliiru tube tuyiji kwo ino ndeto yitu itagayamimala mu baandu.

Tukagwajika umukolwa Ibufuliiru kandi li Tumenye Ibufuliiru mu nzaliro zo'kudeta kwo tutabaale na tugendereze nitu ngisi abakakola na byo bakakola higulu tuyitabaale twehe twe tuliri hohe zeno, ne'bibusi ibigayija. Tuyemeziri kwo buzira kuyandika, abagayija ngayo ndeto bagagwanaho.

Tuyiji bingi mu bindu byo'buhinga buhyahya, tubishobwiri, tunagweti tugabikolesa. Ku benge biki tutabikolese mu kugwasa indeto yitu Kifuliiru? Byo bitumiri guno mukolwa guliri hano higulu yizo nzaliro zitu zitakibere nzaliro naho haliko imikolwa yitu ihikire ngisi mundu.

Biki tugasoma, tugasomeesa

Indeto yitu Kifuliiru iliri ndeto nga zindi ndeto zooshi, haliko haliri ibindu bingi ihushini kandi li itashushini ne'zindi ndeto. Hano twamuyerekana biki tugasoma na tugasomeesa higulu ugwane wamenya biki ibikulindiri na biki ugayunguka li wangakulikira gano masomo ge'Kifuliiru hano.

• Ukuharura: Mu bindu ibiyijikini ukuba binovu bweneene mu zindi ndeto, kuliri kuharura. Haliko ikyanya tukayiegereza twanasalira bweneene higulu lyo'kuharura mu Kifuliiru, twanayijigwana kwo ukuharura mu Kifuliiru kuliri kakayu bweneene ng'ibuye.

  Kibuuzo: Ku benge biki ukuharura kuliri kukayu mu Kifuliiru?

  Ishuvyo: Higulu ukuharura nga ukushaga ku higuma ukuhisa ku ikumi biliri bnovu ikyanya utakulikiza ingambo lyo lyoshi lirya. Haliko ikyanya kera wakulikiza igambo, kwo kudeta ikindu kandi li ibindu igweti ugaharura, ukuharura ukushaga ku higuma ukuhisa ku bulinda kumuyami hinduka lwoshi lwoshi, binahune tumenye bwija biki tugakoleesa.

• Ubuniini na Ubwingi bw'amagambo: Indeto zooshi zigweti ngisi kwo zigizirwi na ngisi kwo amagambo gazo gagizirwi. Ubuniini kuliri kudeta ku kyanya wadeta ikindu kiguma naho. Ubwingi ku kyanya ibindu bikoli lenziri ikiguma. Mu Kifuliiru ubuniini no'bwingi bw'amagambo iliri njira italiri novu ukuhulukana higulu tukwaniini ukutegwajika no'kumenya amagam,bo ge'Kifuliiru. Hano hanabagage kera hayija ugundi mukolwa, ukukumanya amagambo ge'Kifuliiru. Ku zeene ndekyo kitaabo kandi li kibaaja tugweti kyo twangashaaza mwohe amagambo goshi ge'Kifuliiru, tugirage kuti? Byahuna tukole, tugakumanye, tugaberana ahandu haguma.

• Amagambo ge'Kifuliiru: Gano magambo ge'Kifuliiru, guliri mukolwa ugulenziri ngisi kwo umundu angasalira higulu tugweti tugakola ukudeta kwo tukumanye amagambo goshi ge'Kifuliru ukudeta kwo tumenye magambo maki tugweti, maki agatakizikikolesibwa, na magambo maki agagweti gagabutwa mu ndeto yitu Kifuliiru.

• Utwaya twe'Bufuliiru: Ukudeta kwo tuliri Bafuliiru, yibyo bitamaziri byooshi tuloziizi. Ukumenya imwitu Ibufuliiru, utwaya twa yohe, imigazi, inyiji, kiliri kindu kihamu bweneene. Guno guliri mu mikolwa mihamu bweneene tugaba twakola ku kyanya tugaba twaguhisa hala higulu gugatutabaala ukukizi genbda tugayingira mu mizi ya ngisi kaya.

• Abafuliru: Ukuba tuliri Bafuliiru, tukwaniini ukuyimenya twehe tweneene. Gun mukolwa tugagukola ukudeta kwo tuhise abandu bitu hala. Nyandi mwami witu twehe Bafuliiru ku zeene? Ba nyandi abakakola ibija Ibufuliiru? Ba nyandi abagweti bagakola higulu batabale Ibufuliiru, Umufuliiru, ne' Kifuliiru ku zeene? Bino byooshi iliri mikolwa mihamu bweneene.

• Izindi ndeto: Mu byoshi tugakizi genda tugakola, bweneene ukuharura no'bwingi bw'amagambo, tugakizi genda tugabika mwo izindi ndeto. Guno mukolwa guliri hano gutabaale ngisi Mufuliiru. Haliri abatamuganuula i Kifuliiru haliko banabe baloziizi bamenye ino ndeto yabo: Tugabagwasa nabo.